TRAKTOR 1

Í SVEITINNI: Karl og Grétar á yngri árum.

Á morgun, fimmtudaginn 25. júní klukkan 10:00 verður hálfrar aldar draumur tveggja vina að veruleika þegar hringferð þeirra hefst á traktorum hringinn í kringum landið. Þeir kalla sig Vini Ferguson og fara hringinn á tveimur Massey Ferguson traktorum, annar þeirra var traktorinn sem þeir unnu á í sveitinni fyrir fimmtíu árum síðan. Félagarnir ætla að leggja góðu málefni lið og safna fyrir Vináttu – forvarnarverkefni Barnaheilla gegn einelti. Þeir leggja af stað frá Olísstöðinni í Álfheimum og áætlað er að ferðin taki 12-14 daga.

Þeir Karl Friðriksson, framkvæmdastjóri hjá Nýsköpunarmiðstöð Íslands, og Grétar Gústavsson, meistari í bifvélavirkjun og áhugamaður um búvélar og fornbíla, voru saman í sveit á bænum Valdarási frá fimm ára aldri fram á unglingsár og unnu ýmis sveitastörf. Draumurinn kviknaði þegar þeir þeir byrjuðu að vinna á traktornum, sem verður annar fararskjótinn þeirra í ferðinni.

„Það kom aldrei til greina annað en að fara á traktornum okkar, þeim sem við lékum okkur í og unnum á í sveitinni. Massey Ferguson, tegund 35X, árgerð 1963 Enda hefur þessi draumur blundað í okkur í 50 ár og við erum sammála um að maður eigi að láta góða drauma rætast,“ segir Karl.

„Fyrstu árin vorum við látnir sækja kýr, raka frá og og rifja. Áður en við náðum niður á kúplinguna á traktornum vorum við nýttir til að vinna hin ýmsu störf á þeim. Grétar var nú alltaf meiri vélamaður en ég og var fyrri til. En við náðum vel saman við að vinna á traktorunum og nýta þá okkur til skemmtunar,” segir Karl.

„Okkur var auðvitað sýnd mikil ábyrgð og leyfðist að ferðast um á vélunum milli bæja og svo notuðum við traktorana okkur til skemmtunar þegar tími gafst til,” segir Grétar.

Massey 63 copy

VALDARÁS: Þarna voru Grétar og Karl í sveit í mörg sumur og kynntust dásamdum traktorsins fyrst.

Félagarnir ákváðu að nota tækifærið og leggja góðu málefni lið um leið og þeir létu gamlan draum rætast. Þeir safna áheitum í gegnum símanúmerið 904 1900, fyrir 500 krónur, en ágóðinn rennur til Vináttu – forvarnarverkefnis Barnaheilla gegn einelti í leikskólum. Þangað á einelti gjarnan rætur að rekja og mikilvægt að hefja forvarnir strax þá.

„Við vonum auðvitað að sem flestir hvetji okkur áfram með því að hringja í söfnunarsímanúmerið eða leggja inn á bankareikning Barnaheilla, því samtökin vinna að mörgum þörfum verkefnum í þágu allra barna á Íslandi,“ segir Grétar.

Hægt er að hringja eða senda sms í síma 904 1900 (500 kr.) með textanum: Vinátta – einnig má leggja inn á bankareikning Barnaheilla 0334-26-4521, kt. 521089-1059.

Stöðvað verður á öllum Olísstöðvum á leiðinni þar sem fólk fær að skoða vélar og ökumenn.

TRAKTOR22

GAMAN SAMAN: Á traktor.

Related Posts