Petra D. Karvel (31) datt í lukkupottinn:

 

nivÓvænt Þegar Petra D. Karvel var í sumarbústað í Vestur-Húnavatnssýslu fyrir skömmu fann hún furðulegt fyrirbæri inni á baði.

„Þetta atvikaðist þannig,“ sagði Petra, „að ég fór inn á bað og sá þá glitta í eitthvað bak við spegilinn í innréttingunni. Ég dró það fram og þá reyndist það vera Nivea-sólolía. Ég spurði tengdaömmu mína, Maríu Auði Guðnadóttur (82), sem á bústaðinn hvað þetta væri. Hún sagði mér að olían væri a.m.k. 40 ára gömul og í þá daga hafi brúnn húðlitur þótt einkar eftirsóknarverður. Þeir sem voru súkkulaðibrúnir frá toppi til táar voru sætari miðað við gildismatið þá og höfðu klárlega farið með Guðna í Sunnu eða Ingólfi í Útsýn til Spánar og notið lífsins eins og heldri menn gera.“

En notaðir þú olíuna?

„Nei, en ég væri alveg til í að prófa hana. Það var bara ekki nógu mikið sólskin þessa daga sem við vorum í bústaðnum. Kannski prófa ég hana næsta sumar.“

Satt er það, sólbrúnka gefur frísklegt yfirbragð á húðina og D-vítamín í kroppinn en varast ber að ganga of langt í þessum efnum. Sagan fer víst í hringi og óvíst verður að telja að sagan fari í hring með sólolíuna af því heimsbyggðin er búin að læra að kossar rósfingruðu morgungyðjunnar, þ.e. sólarinnar, geta valdið húðkrabba og betra að vera löðrandi í sólarvörn en sólolíu í sólbaði.

 

 

Related Posts