Leikarinn Kyle MacLachlan (55) endur tekur rullu sína í Twin Peaks:

Óttablandinn eftirvæntingarhrollur fór um margan Twin Peaks-aðdáandann þegar David Lynch og Mark Frost létu þau boð út ganga að þeir ætluðu að gera nýja Twin Peaks-seríu. Þættirnir nutu mikilla vinsælda fyrir 25 árum enda kvað við vægast sagt óvenjulegan og áhugaverðan tón í bandarísku sjónvarpi þegar súrrealistinn Lynch gerði strandhögg þar.

Til stendur að gera níu þætti og Lynch ætlar sér að leikstýra þeim öllum. Það boðar gott og nú hefur leikarinn Kyle MacLachlan greint frá því að hann muni snúa aftur til Twin Peaks í hlutverki alríkislögreglumannsins Dale Cooper. Það lofar ekki síður góðu enda var Cooper límið í þáttunum og vandséð að sjá fyrir sér framhald án hans.

Þegar áhorfendur skildu við Cooper fyrir 25 árum hafði heldur syrt í álinn hjá honum þar sem morðinginn Bob hafði tekið sér bólfestu í líkama hans þannig að það verður fróðlegt að sjá hvort góði gæinn, Cooper, endi sem aðal illmennið í nýju þáttunum.

Persónugalleríið í Twin Peaks var sérstaklega skemmtilegt og litskrúðugt og aðstandendur þáttanna hafa látið það berast út að von sé á fleiri góðkunningjum í nýju þáttunum.

Related Posts