Garðyrkjusérfræðingurinn Alan Tichmarsh fann nýlega berserkjasveppi í garði Elísabetar Bretadrottningar við Buckingham höll. Þetta gerðist þegar Tichmarsh var að vinna að sjónvarpsþætti sem ber heitið „Garður drottningarinnar“ og verður sýndur á ITV sjónvarpsstöðinni.

“Ég mun ekki borða neitt af þessu,” mun Tishmarsh hafa sagt þegar hann rakst á sveppina. Berserkjasveppir hafa í gegnum tíðina verið notaðir til að komast í vímu og sagnir eru um að víkingar hafi notað þá til að koma sér í stríðsham fyrir bardaga. Það er hinsvegar þekkt að margir verða mjög veikir af neyslu þessara sveppa.

Náttúrufræðiprófessorinn Mick Crawley var með Tichmarsh í för og hann lét þess getið að í gamla daga á Bretlandseyjum hafi þorpsfífl gjarnan verið látin éta þessa sveppi og síðan var þvag fíflanna drukkið. Þar með komust menn í vímu án þess að verða veikir.

Related Posts